CSIC-INIAko aldizkarian, Spanish Journal of Agricultural Research (SJAR), “Pathogenesis of domestic pigs submitted to single or multiple mycobacterial sensitizations previous to experimental infection with a local pig isolate of Mycobacterium bovis” izeneko artikulua argitaratu berri da. Artikulu honetan, BIOTECSURek (BiotechII: EuroepAid/136-457) eta INTAk (PNBIO 113034) finantzatutako nazioarteko ikerketa-proiektu bateko emaitzak kontatzen dira eta NEIKEReko mikobakterien taldeak parte hartu zuen ikerketan. M. bovisen (MB894) andui baten patogenotasunari buruzko azterlana da, Argentinako hiltegi batean zerrien tuberkulosi-lesioetatik isolatu zen eta herrialde bereko gizakietan maiz isolatutako M. bovisen espoligotipoa (SB0153) izateagatik aukeratu zen. Azterketa INTAk Buenos Airesen dituen instalazioetan egin zen eta bi zerri-talderi egindako erronka izan zen. Horietako talde bat erronka egin baino lehentxeago behi-eta hegazti-tuberkulinekin intradermikoki sentsibilizatu zen eta beste taldea, honez gain, aldez aurretik NEIKERen beroaren bidez jarduerarik gabe utzitako M. bovis suspentsio batekin sentsibilizatu zen.
Azterketa honek, lehena Argentinan txerriekin tuberkulosi-infekzio esperimentalak egiten, ahotik kutsakorra den anduiaren patogenotasuna berretsi zuen. Infekzioak eragin linfonodular handia izan zuen eta barreiadura bide gisa biriketako tropismoa erakutsi zuen. Talde immunizatuan, behatutako lesioak arinki zabalagoak izan ziren baina granulometan osagai fibrotiko handiagoa izan zuten. Erantzun humorala infekzio ondorengo 70 egunetan antzematen hasi zen eta nabarmen handiagoa egin zen 100 egunen buruan, animalien nekropsiaren unean. Erantzun humorala lesioen hedapenarekin lotuta egon zen, batez ere immunizatu gabeko taldean. Emaitza horien arabera, immunizazioak tuberkulosiari permisibitate handiagoa eragin diezaioke, nahiz eta erantzun immunitario humorala biziagoa izan. Hori bat etorriko litzateke etxeko txerrietan egindako beste ikerketa batzuen emaitzekin, bestalde bakterio-karga eta lesioen hedadura murriztu zela ikusi zen basurdeekin. Desberdintasun horrek, etxekotzeak ere immunitate-sisteman aldaketak eragin zituela iradoki dezake.
