Azken urteotan, areagotu egin da hausnarkarietan probiotikoak ikertzeko interesa, antibiotikoak erabiltzearen alternatiba gisa hartzen baitira. Probiotikoak, oro har, hausnarkarietan produkzioa areagotu eta berauen osasuna hobetu dezaketen gehigarri gisa proposatu dira. FAO/WHOk honela definitzen ditu: “mikroorganismo biziak dira, ostalariaren osasunerako ondorio onuragarriak eragin ditzaketenak kantitate egokietan ematen direnean”. Probiotikoek bi estrategia ezberdinen arabera funtziona dezakete, alde batetik mikroorganismo patogenoak edo kaltegarriak kanporatuz, nitxo berean lehiatzen direlako, edo mukosetan zelula immunitarioak zuzenean estimulatuz. Gainera, zenbait txertoren eraginkortasuna areagotzeko terapia konbinatuetan probiotikoak ematea proposatu da.
Testuinguru horretan, Animalien Osasun Sailean ikerketa bat egin da, eta bertan honako aztergaien efektuak konparatu dira untxietan ezarritako infekzio-eredu batean: bakterio probiotiko bat (Dietzia) bakarrik, zein paratuberkulosi-txerto inaktibatu batekin konbinatuta hartzeak duen eragina eta Mycobacterium avium subsp. paratuberculosis (Map) infekzioaren aurkako txertaketa bakarrik hartzeak duen eragina. Hala, ikusi da paratuberkulosi-txertoaren administrazioak erantzun humoral handia eragiten duela, bai eta neutrofiloek estimulu homologoen (Map) eta heterologoen (Map ez diren beste patogeno batzuk) aurrean duten eragina areagotzen duela, neutrofiloak entrenatuz, hesteekin harremandutako ehun linfoideko makrofagoek (GALT) zitokina proinflamatorioak estimulatzen dituztela, eta bertan Map karga murrizten dela. Hala ere, txertoa hartu ondoren probiotikoa emateak ez zuen neutrofiloen jarduera estimulatu, eskaera metabolikoa areagotu zuen eta hanturaren aurkako zitokinak ezabatu zituen. Hala ere, txertoa soilik jaso zuten animalietako erantzun humoral eta bakterio-karga baxu antzekoa aurkeztu zuen talde honek. Azkenik, probiotikoak, ez zuen erantzun humorala areagotu, ez eta neutrofiloen jarduera ere. Gainera, GALTen Map karga tratamendurik gabeko infekzioaren kontrolean baino handiagoa izan zen.
Laburbilduz, ondoriozta daiteke probiotikoa gai izan zela erantzun immunitarioa aldatzeko, infekzioa ezabatzea galaraziz, eta horrek txertoa hartu ondorengo neutrofiloen erantzunean eragina izan zuela. Ikerketa honek, beraz, frogatzen du probiotiko bat emateak txertoak edota infekzioak aktibatutako erantzun immunitarioko ibilbideak modulatzeko gai dela, eta, horrez gain, infekzioaren ondorioak okerragotu ere egin ditzakeela, azpimarratuz garrantzitsua dela tratamendu-konbinazio guztiak egiaztatzea agente infekzioso eta animalia-espezie bakoitzaren testuinguru espezifikoan.
Esteka honen bidez kontsultatu daitezke azterketaren xehetasunak.
