GO_INMUNOGEN proiektua Nekazaritzako produktibitatearen eta jasangarritasunaren arloko Berrikuntzarako Europako Elkartearen (AEI-Agri) autonomiaz gaindiko talde eragileen ekimen estrategiko bat da, NPB 2023-2027ren Plan Estrategikoaren esparruan, % 80an Landa Garapenerako Europako Nekazaritza Funtsaren (LGENF) bidez finantzatua eta % 20an Estatuko administrazio orokorraren (EAO) bidez. 2023ko deialdian, GO_INMUNOGEN proiektua 496.202,79 euroko dirulaguntza jasotzeko proposatu zen, eta nekazaritza, abeltzaintza, arrantza, baso eta landa garapeneko sektore guztiek aurkeztutako 160 proiektu baino gehiagoren artean hirugarren balorazio onena lortu du. Talde operatiboak honako hauen lankidetza aktiboa du: abeltzainak (CONAFE, FECL eta ARAPAR), ikerketa zentroak (NEIKER), genetika molekularreko laborategia (XENETICA FONTAO), Albaitaritza Zentroa (LA ESPINA LTZ) eta Espainian behiak intseminatzeko zentroak (ABEREKIN). 5.800 abeltzaintzako ustiategi baino gehiago sartzen dira, eta horiek onura jasoko dute zuzenean. Gainera, beste abeltegi batzuetara transferitu daitekeen inpaktua espero da, baita nazioartean ere, Espainia behi-esperma esportatzailea baita.
GO_INMUNOGEN proiektuaren helburu nagusia behi-abeltzaintza jasangarri eta eraginkor baterantz pausuak ematea da, behien paratuberkulosiarekiko (PTB) sentikortasuna eta erresistentzia ebaluatzeko eta Hazkuntza Programatan genetika hobetzeko aukera emango duten markatzaile genetikoak erabiliz. Helburu espezifikoak hauek dira: (a) animaliek PTBrekiko duten sentikortasuna eta erresistentzia aurreikusi eta horren arabera kategorizatzeko aukera emango duen tresna bioinformatiko bat garatzea, (b) Frisiar, Alpetar Arre eta Limusin arrazetako animalietan tresna baliozkotzeko probak egitea.
Otsailean hasi zen bakterio-karga zein gamma interferoi erantzuna kuantifikatzen Mycobacterium avium subsp. paratuberculosis (MAP) espeziearekin ex vivo infektatutako makrofagoetan. Orain arte guztira aztertuko diren ABEREKINeko 100 zezenetatik 45en zelulak lortu dira odol-laginetan oinarrituta. Jarduera horrek berebiziko garrantzia du proiektuarentzat, informazioa biltzea ahalbidetuko baitu, iragarpenak baliozkotzeko eta hobetzeko. Lankidetza, antolamendu, logistika eta laborategiko laneko erronka handienetako bat laginketak, laginen bidalketa eta analisia dira, izan ere, lagina hartu eta laborategian prozesatu bitartean ahalik eta denbora gutxien igaro behar baita. Horregatik, ABEREKINen eta NEIKERen instalazioen arteko hurbiltasunak aukera emango du bideragarritasun handiko zelula zuriak lortzeko, informazio gehiago emanez ondorengo jarduerak ahalik eta berme handienarekin egiteko behar diren baldintzei buruz.
Laburbilduz, GO_INMUNOGEN proiektuak abeltzaintza sektorea etorkizun jasangarriago eta lehiakorrago baterantz bultzatzea du helburu, markatzaileek lagundutako hautespen genetikoaren bidez animalien osasuna eta gaixotasunekiko erresistentzia hobetuz. Animalien PTBrekiko erresistentzia eta immunogaitasun orokorra hobetzean, tratamendu antibiotikoen beharra murriztuko da, animalien bizitza luzatuko da eta ekoizpenaren eraginkortasuna hobetuko da, nekazaritza eta abeltzaintzaren garapen jasangarria eta elikagaien segurtasuna bultzatuz.
Argazkia: NEIKEReko Animalia Osasun saila
