Pasa den martxoaren 26tik 28ra European Phagocyte Workshop egin da Ikerketa Kardiobaskularren Zentro Nazionalaren (CNIC) instalazioetan, Madrilen. Kongresu honek fagozitoen biologia aztertzen duten ikertzaileak biltzen ditu.
Fagozitoak, izenak dioen bezala, fagozitosia egiten duten zelulak dira. Fagozito profesionalen barruan makrofagoak, monozitoak, neutrofiloak eta zelula dendritikoak daude, besteak beste, baina kongresu honek makrofagoak eta neutrofiloak ditu ardatz nagusi.
Fagozitosi prozesuaren bidez, zelula horiek partikulak irensteko gai dira, zelula barneko bakuola edo konpartimentu bat, fagosoma deritzona, sortuz. Fagosoma, aldi berean, lisosomarekin fusionatzen da fagolisosoma sortuz, non digeritutako partikularen degradazio entzimatikoa gertatzen den. Fagozitosiari esker, inmunitate-sistema patogenoak eta hondakin zelularrak deuseztatzeko gai da.
Hala ere, fagozitosi bidez patogenoa deuseztatzea ekiditeko, hainbat mikroorganismok immunitate-sistemagandik ihes egiteko mekanismoak dituzte. Horien artean azpimarragarria da Mycobacterium avium subsp. paratuberculosis (MAP), beste mikobakterio batzuk bezala ostalariaren makrofagoak asaldatzeko gai dena, horrela fagosoma eta lisosomaren arteko fusioa saihestuz. Bestetik, jakina da MAP-ez infektatutako behietan, neutrofiloek parte hartzen duten bideak asaldatuta daudela, animalia hauen neutrofiloak baldintza optimoetan lanean ari ez direla adieraziz. NEIKEReko Animalien Osasun Sailean, Estatuko Ikerketa Agentziak finantzatutako PARAINVAX proiektuaren esparruan, MAP desagerrarazteko neutrofilo eta makrofagoen arteko elkarlana nolakoa den ikertzen dihardugu, bai eta MAP-ek eragindako infekzioan txertaketaren ondorioz neutrofiloek funtzio-antimikrobianoak mantentzeko edo areagotzeko modurik duten aztertzen ere.
Gure lankide Maitane Mujikak, Eusko Jaurlaritzako Hezkuntza Sailaren doktoretza aurreko laguntza batekin finantzatuta, kongresu honetan egon eta gure lanaren “Mugica M, Molina E, Oyanguren M, Badiola A, Vidal G, Arrazuria R, Elguezabal N. The role of neutrophils in paratuberculosis disease and vaccination: evidence of activation and trained immunity” emaitzak partekatzeko aukera izan du. Horrez gain, zelula fagozitikoekin beste alderdi konkretu batzuetan lanean diharduten ikerketa-talde batzuengandik ikasteko aukera ere izan du, hala nola erregulazio metabolikoan eta epigenetikoan, zein infekzioen eta gaixotasun kroniko esterilen migrazioan lanean ari direnekin.
PARAINVAX proiektua (Unveiling early immune responses and trained immunity associated to paratuberculosis vaccination and infection in cattle-PARAINVAX, PID2021-125807OB-C22) Leongo Unibertsitatearekin koordinazioan burutzen ari den proiektu bat da, eta Estatuko Ikerketa Agentziaren finantzaketa jasotzen du.
Argazkia: NEIKEReko Animalia Osasun saila
