Joan den astean (2023ko martxoaren 6tik 10era) Sevillan 10. Ardi Albaitarien Nazioarteko Biltzarra (ISVC) egin zen, “Sociedad española de Ovinotécnia y Caprinotécnia” (SEOC) elkarteak antolatu zuen. ISVC, “International Sheep Veterinarian Association”-ek sustatzen du, eta ardi albaitaritzaren inguruko nazioarteko ekitaldirik garrantzitsuena da. ISVCrekin batera, lehenengo hiru egunetan, “European College of Small Ruminant Health and Management” (ECSRHM) delakoaren hiru urteroko biltzarra egin zen, eta azken bi egunetan, SEOCen urteroko biltzarra. Bost egunetan, biltzarkide askok parte hartu zuten (45 nazionalitate desberdinetako 680 lagunek izena eman zuten), eta 70 hitzaldi eta 300 komunikazio baino gehiago aurkeztu ziren. Horietatik bi heren ahozko formatuan defendatu ziren eta gainerakoak poster gisa. Txostenak eta komunikazioak sei gai-multzotan sailkatu ziren, lau ISVCri berari zegozkionak (Sustainability, General Diagnosis to Reduce Antibiotic Usage, Global Threat to Sheep, Teaching and Transfer), eta beste biak ECSRHM eta SEOC izan ziren. Azaldutako gaien artean, interes handiena piztu zutenak ardientzako mehatxu globalen – Global Threat to Sheep multzoan sartutakoak izan ziren. Bertan, gaurkotasun handiko mugaz gaindiko zenbait gaixotasunen, hala nola Rift Valley-ko sukarra edo ardi- eta ahuntz-baztangaren inguruan hitz egin zen. Gai “klasikoez” gain, ugatz-guruinaren mikrobiomarekin edo txertoen garapenean, proba diagnostikoetan eta gaixotasunen tratamenduan nanoteknologiaren aplikazioarekin lotutako gai “modernoago” batzuk ere landu ziren.
Gaurkotasun handiko gaia ere, Roberto Ruiz Neikerreko lankideak “Reduction of greenhouse gas emissions and carbon footprint on sheep production” hitzaldian landu zuena izan zen. Ez zen izan Neiker-ek biltzarrean izan zuen parte-hartze bakarra, Ramón Justek CZ Vaccines-ek antolatutako sinposioan “Trained immunity. To theory from practice or why vaccination is more” hitzaldia eta Aitor Cevidanesek “Evaluating haematological changes in Latxa sheep associated with Anaplasma infection in semi-extensive grazing system” komunikazioak aurkeztu zituzten.
Norbaitek hurrengo ISVC kongresura joan nahiko balu, 2025eko martxoaren 10etik 14ra Wollongon, New South Wales, Australian izango da.
