Irailaren 29an, irakasleentzako prestakuntza jardunaldian parte hartu genuen, Euskal Herriko Unibertsitateko (UPV-EHU) Donostiako campusean. 50 bat irakaslek hartu zuten parte Aranzadi Zientzia Elkarteak eta Eusko Jaurlaritzako Berritzegune Nagusiak (Prestakuntzan eta Hezkuntzaren Berrikuntzan laguntzeko zentroa) antolaturiko “Urmaeletako biodibertsitatea ezagutzen” protokoloen aurkezpen ikastaroan, Eskoletako Urmaelen Sarearen eta Kutxa Fundazioak finantzaturiko MIKROKLIMA proiektuaren baitan.
Ikerketa, hezkuntza eta ingurumena eskutik doaz MIKROKLIMAn. Hortaz, lortutako datuek Euskal Herrian bizi diren eltxo espezieei buruzko ezagutza zabaltzeko aukera emango digute. Era berean, “zientzia herritarra”ren bidez lortutako emaitzak laginketa zientifiko profesionalaren bidez lortutakoen parekoak diren balioztatuko dugu. Azkenik, proiektuak lehen eta bigarren hezkuntzako ikasleei eltxoak, haien garrantzia eta bizi-zikloak hobeto ulertzen lagunduko die, zientziarekiko interesa pizten duen bitartean.
Urmaelak laborategi natural bat direnez, oso gune egokiak dira eskolako hainbat eduki kurrikular lantzeko. Urmaelak, ekosistema gisa, sistema eta fenomeno naturalak ebaluatu eta interpretatzeko aukera ematen die ikasleei, errealitatea ebidentzia zientifikoen ikuspegitik ulertzeko eta ezagutza eta metodologia zientifikoa modu koherente, egoki eta zuzen batean erabiltzeko tresna aproposak izanik.
MIKROKLIMAk hainbat proiektu biltzen ditu mikro-hezeguneetako prozesu naturalak monitorizatzeko sare bat sortzearen inguruan, zeinetan espezie zentinela batzuk barne hartzen dituena, klima-aldaketak eta jatorri antropikoko beste alterazio batzuk izan ditzaketen ondorioen jarraipena egiteko. NEIKERretik, batez ere, eltxoekin lotutako proiektuetan parte hartzen dugu. Eltxoen ugalketa tradizionalki hezeguneen presentziaren inguruko kezka herrikoietako bat izan dela (eta izaten dela) kontuan hartuta, bertako biodibertsitatearen (artropodoak eta anfibioak) eltxo antropofilo eta/edo inbaditzaileen kontra izan dezakeen babes-eragina aztertuko da landa-azterketa eta ikerketa esperimental baten bidez.
